كيكة الشموع

كيكة الشموع 

المقادير:

الكيك:

3 بيضات+1 كاس سنيدة + 1 كاس زيت ماعامرش مزيان + 1 كاس قهوة معصرة + 1 فاني + ملح+ 2 معالق كبار كاكاو + 2 خمارات + دقيق حسب الخليط (يكون الخليط شوية جاري باش يجي الكيك رطب)

كنخدمو هاد العناصر مزيان و نصبوه ف لاطة مدهونة بالزبدة و مرشوشة بالدقيق و ندخلوها للفران طيب ملي نخرجوها نقطعوها بالكادر لي غادي نستعملوه فالمونطاج

الطبقة الثانية:

فمولينكس كنديرو: 2 ياغورت طبيعي+ 1 كاس نيدو+ 4 فرماجات مثلثين او مربعين + نصف كاس سنيدة+ شوية فاني

كنخلطو كلشي مزيااان و نكبوه على الكيك

نشعلو الفران من الفوق و ندخلو الكيك باش الطبقة 2 تقبط راسها و نردو معاها البال باش ماتحمرش مرة مرة نمسو بالاصبع الى مالصقش فية الخليط يعني راه واجد

نخرجوه من الفران و نخليوه يبرد

المرحلة الاخيرة: كناخدو الغطايات ديال القراعي نستفوهم بشوية فوق الكيك و ناخدو كاوبيل نديروه فصفاية و نرشوه مزياان على الوجه

من بعد نزولو هادوك لغلايق بشوووووووية باش مانخسروش الديكور و نتكو عويدات ديال قرنفل وسط الدوائر البيضاء و ها الكيك واجد

و الصور غتوضح ليكم اكثر

بالصحة و الراحة