قصة حماتي تعاستي و سعادتي (قصة مغربية)
كنت كنظن الزواج هو نهاية السعيدة لقصص الحب ولكن نسيت بعض الظن إثم من بعد ما تخطبت بعدت كّاع على صحاباتي زوينات ودكيات و خصوصا الحادكّات حيت أنا معندي تا حاجة من هادشي و حيت غادي يشكلو عليا خطر كبير يسحابني غانطفرو ولكن ... خليوني ساكتة من قبل ما نتزوج كنت متيقنة أنني غنعيش بحال فيديو كليب شرين أنا كلي ملكك عايشة مع راجلها ففيلا قدها قد الخلا بوحدهم وملي كتفيق كتلقى قدامها الفطور فصينيا مع الورد الغوز مع إبتسامة راجلها لي كتنور العالم و إمتى ما بغات تلعب يلعب معاها بحنان واخا يكون غضبان ميبينش ليها ولكن ملي تزوجت قالوليا بلي شرين براسها مطلقة يعني داكشي وهم فوهم :’( أول نهار من بعد زواج عايشة مع راجلي وخوتو وعكّوزتي بطبيعة الحال فقت معطلة يسحابني بحال دار با كنلقى الفطور واجد ولكن فدار راجلي لقيت عكّوزتي لي واجدة عل صباح منوضة لحيحة
- أش هاد شي لا فطور واجد لا دار مجموعة لا حوايج مصبنين لا صالون مخمل ويلي ويلي الخملة دايرة علقنات
بقات فيا عكّوزتي مسكينة وأنا دابا مرات ولدها يعني بحال بنتها خصني نعاونها كّفظت على يدي وبديت
- عندك صح أخالتي حرام هادشي ، ناري ناري على روينة و الوسايد كل واحد كيضحـك منين ، والفطور باقي ما وجدش؟؟؟؟ لا لا زادو فيه
- شكون هما؟؟؟
- لي مولفين كيديرو هادشي ، شكون لي كيديرو بعدا؟؟؟؟
- أنا
- انتي؟؟ وعلاش كتعايري راسك أخالتي
عكّوزتي وجهها مشا منو لون مسكينة زعمة تكون مريضة ومخبيا علينا دخل راجلي وبدا كيخنزر فيا تقول قاتلة روح
- راجلي : أش هاد الغوات على صباح؟؟؟
- عكّوزتي : والو غير هانتا كتشوف دار
- أنا: قالتك خالتي شوف دار ماشي فيا أنا
- راجلي: أه شفتها وعلاش مجمعتيهاش؟؟؟؟
- أنا:وعلى أنا مالي لي رونها يجمعها واحد ياكل لفول واحد يتنفخ فيه
- راجلي: بغيتي دابا نعيطو لمحقق كرومبو نقوليه قلبلينا على لي رون صالون باش نقولو ليه يجي جمعو ياك
- أنا: فكرة زوينة عندي رقم ديالو شاركت فيه واحد المرة ومربحتش نكون زعمة جاوبت غالاط؟؟؟
- راجلي: لا حرام مراتي دكية تجاوب غالاط أنا واقلة لي تزوجت غالاط يالاه جمعي دار وطيبي لفطور وداك الفشوش خليه فداركم
عجوزتي شفت الفرحة فعينيها وانا شفت شقاء بعينيا نضت بديت بصابون هو لول ، لبارح كنت فوق العمارية واليوم هانا فوق البانيو لبارح كانو يديا روطبين ومنقوشين ودابا عامرين بتيد و جافيل سبحان مبدل الأحوال بديت كنفرك من 10 تال 02 يديا حفاو وظهري تقسم
- كاين شي غدا أمراتي العزيزة
- إينا غدا راه منين حليت عيني وانا كنفرك
- أويلي انتي مازالا فداك جوج شريوطات ودابا أش غاناكلو؟؟
تاكل جنابك إن شاء الله سمعت عكّوزتي من الكوزينة كتجاوبو سلامة غي طالقة ودنيها بحال الردار
- أجي يا وليدي راني موجدة ليك شهيوة لي كتعجبك كون بقات على مراتك تغديتي بكريييي
- واخا أميمتي الله يخليك ليا
حسيت بالحكّرة ودموع فعينيا الله ينعل بو هاداك لي قال سبع يام دالباكور لواه سبع يام ديال قشور الهندية كون نشدو نشتف على بوه
جلسنا كنتغداو وعجوزتي بدات كضرب ليا فالمعاني - عرفتي أنا نهار لول من بعد زواج رديت دار راجلي كتبري صبنت وطيبت وخملت وغسلت زرع و نقيتو وخرجتو يتشمش وهادشي درتو قبل ما عجوزتي تحل عينيها من نعاس - هاد عجوزتك أخالتي كانت شريرة عرفتي أنا ميمتي عجوزتها شهر ما خلاتها تمد فالما الله يرحمها جداتي كانت مرا ونص كتخدم شغلها بيديها مكانتش كترضى شغل دارها تخدمو ليها بنت الناس = شفت راجلي حبس دغما وبدا كيخنزر فيا بحالا كيعطيني الورقة صفرا فهمت راسي وكملت الماكلة وانا ساكتة... المهم كملنا أنا وعجوزتي تخمال فالعشية ومرة ومرة كدوز ليا شي كليمات نقي بيهم وديناتي وانا كندير راسي مناش هنا وصل ليل وقالت ليا انتي لي غادي طيبي العشا لي من بعد طيبتو ورديتو فوق البوطة مشيت كنهضر مع ميمتي كنت دايرة واحد ساعة نسيت راسي تا قطعو عليا عاد تفكرت العشا مشيت كنجري لقيت شياط خارج من الكوكوط حليتها لقيت بطاطة رجعات جمر ولي زاد كمل القاضية عجوزتي سمعتها جايا لكوزينة هههيييي البارح كنت عروسة واليوم غانكون مطلقة الله ياربي الله أش هاد الوحلة أول حاجة طاحت ليا فبالي هي ندير موتة حمارة كنت شفتها فالفايسبوك شحال هادي المهم درت راسي سخفت تا سمعت عجوزتي فوق راسي كتوْلوْل شداتني ضحكة وانا كنتخيل عجوزتي خايفة عليا هه والله مقدرت نحبسها وبديت كنضحك ملي حليت عينيا لقيت عجوزتي لوان ولاو ليها فوجها ملي عاقت بيا كنضحك عليها مكرهاتش تشطب بيا دنيا شفت راسي كحلتها مزيان وبديت كنرغب ونزاوكّ - عافاك أخالتي غطي عليا غير هاد المرا ديريني بحال بنيتك رحميني الله يرحم ليك عجوزتك شفتها دورات وجها عرفت بلي زدت كحلتها - عافاك أخالتي الله ياخد الحق فعكّوزتك والله يرحم سيد الحاج و الله يخلي ليك وليداتك ومعز عليك - يالاه براكة عليا من البكا و شكا وجمعي الوقفا هادي هي لخرا ليك والله المرا جايا منزكّلك رمي داكشي بزربة وعاودي طيبي من جديد راه والله و سولو عل العشا منغطي عليك =نضت عاودت طياب من جديد وهاد المرا متزعزتش من حداه كل مرة نطل عليه مهم تجمع كولشي حدا طبلة كيتسناو العشا وأنا جايباه فيدي حشمانة وراجلي هاز راسو لسما زعمة مفتاخر بيا حطيتو وهو يقول ليا تبارك الله عليك الله يعطيك الصحة وبدات عجوزتي كدور راسها مكرهاتش تعاود ليه أش طرا ويالاه قلنا بسم الله برك راجلي على بطاطة وهي طير من الطبسيل باقا قسح من الحجرة كولشي رد يديه لور وانا رديت طبسيل لكوكوط يعاود يطيب راجلي حشم وحدر راسو وخوتو لي خدام بدا كيصفر وينكّر ولي بيطالي بدا كيضحك من بعد ناضت عجوزتي هي لي قابلات العشا خافت يباتو ولادها بجوع الله ياسيدي ياربي ماداز نهار لول تا غفر ليا الله ذنوب وحمد الله مائة مرة ملي مارجعتش لدار با من نهار لول
نعست وعظامي مدكّدكّين عليا طلع صباح ما حسيت براسي تال لقيت شي حد كيحرك فيا - هييييي شكون نتا؟؟؟ - أويلي على شكون أنا ؟؟ انا العور لي شافك وعجبتيه - تشوف مشاف جدي فالحرب إن شاء الله قول أشبغيتي وخليني نعس؟ - نوضي تطيبي الفطور راه قربو يفيقو موالين دار - إيوا ملي يفيقو ينوضو يطيبو راسهم أنا مالي - أهاه وملي تفيقي انتي سيري تخدمي باش تلقاي متاكلي - دعيتك الله واش عمرك شفتي أراجلي لعزيز شي عروسة فنهارها لول قبل متفطر بدات كتصبن - سلامة على زين عشاك البارح كون مال الواليدة كن بتنا بجوع علاش مقلتهاش ليا قبل زواج بلي مكتعرفيش ديري شغل - كنعرف راه غير ممولفاش على داركم... زعمة كون قلتها ليك متزوج بيا - لا كنت غير غنقص ليك فصداق هه - حيد من قدامي قبل لا جمعت عليك جوقة لقيت عجوزتي كطيب فالفطور فرحت الله يخليها ليا ديما هاكا شافت فيا وهي ترجع للور وهي تقول ليا كملي مم جاتني البكية :’( بقيت فيه واحد ساعة عاد كملتو حطيناه انا وياها ....و راجلي مبتاسم وأنا مخنزرة هاد المرا مقال والوا باش مايتقولبش بحال البارح
مهم دازو ليامات وانا كل نهار بموصيبة جديدة مرة كنكتر الملحة مرة كنقص السكر مرة كندير عجينة الخبز بحال لبغرير مرة قاصحة بحال الحجرة وإلى خرجات مقادة كنحرقها فالفران وعجوزتي مرة كتشكى مني لراجلي مرة كتقوليه كن غير تزوجتي بنت خالتك حسن ليك وليا وأنا كّاع مبقيت داياها فيه همي الوحيد هو يدوز نهاربأقل عدد ممكن من المشاكيل لحاجة لي كنقول قديتها كتعوج والحاجة لي كنقول معوجة كتحرق والحاجة لي كنقول تحرقات كانسمع عليها ألبوم أم كلثوم من عند عجوزتي راجلي قبل زواج كان كيتمنى نلقى ليه سويعة خاوية من وقتي باش نخرج معاه ودبا ولا كيتمنى منلقاش لوقت لي نحك فيه راسي باش ميشوفنيش قدامو الحلوف لاخور غي بلاتي عليه واحد المرة سليت تصبين ولقيتو هاز تليفون كيشاطي فالفايس بوك وملي سولتو قاليا كنلعب غي ليجو يالاه بغيت نعايرو وانا نتفكر فاش سولني واش عندي فايس أول نهار تلاقينا وقلت ليه اه عندنا كنطيبوه فطاجين كيجي بنين وانتوما؟؟؟ بدا كيضحك وقاليا حنا كنطيبو فكوكووط عرفتي متشبعيش منو وخصوصا من يد الواليدة عقلت داك ساعة قلت ليه مع راسي تولد العقارب يعضوك من القنوفة أما دابا كمدتها للقلبي وسكت "الخبيثون للخبيثات " وكل نهار كيدوز و يدو مكتفارقش تليفونو ومرة مرة كيبدا يفرنس بوحدو - بسم الله عليك مالك كتفرنس كيهروك حوايجك - لا غير ربحت فواحد اللعبة وصافي - وشحال هاد لعبة فيها من مليون - نتي مالكي مضروبة على الفلوس هاد لعبة دايرة بحال الحنش - بغيتو يلوي عليك قول أمين شوف أداك راس طنكّ داك لعب ديالك راه فات القياس راني وليت كنشك فيك - واش غير حيت كنلعب كتشكي فيا - ياكما بانو ليك عندي كّرون ولا قاريا فزحام باش منعرفش ليجو من الفايس بوك زعمة راك مزوج خصك دير عقلك إلى مبقاتش عينك فمراتك طلقها ولا قولها أش مبقاش عاجبك فيها - انتي مبقيتي كديها لا فيا ولا فحالتك نهار ومطال وانتي مشغولة - يااك أسيدي ملي مكنتش كنعرف ندير شغل مشكلة كبييرة وملي وليت كندير شغل مشكلة كبر وأنا علاش كندير هادشي كامل على وديت نلقا مناكل ؟؟ كنت فدارنا كنحل عيني كنلقاها واجدة محطوطة أنا راه أسيدي كندير هادشي كلو على ودك باش نبقى فعينك ديما داك لمرا لي حلمتي بيها وتعيش هاني تنازلت على بزاف ديال لحوايج على قبلك فالمقابل تجي تقول ليا مبقيتش داياها فحالتي حيت أسيدي كديني كل سيمانة لسوق تشري ليا وكل نهار أحد كتخرجني نبدل لجو واخا غير فجردة لي حدا الباب وحيت كل نهار كتقول ليا كلمة حلوة وزوينة لي من نهار تزوجنا مسمعتها من عندك - دابا هاد درامة كلها على ود تليفون هاحنا ألالة نحطوه
من بعد هاد أول مدابزة بيناتنا مبقاش كيهز تيليفون غير قدامي فاش كيشوفني كيخبيه فكرت تاعييت ومالقيت ليه حل لداكشي قررت أن مو هي لي غاتعاوني عليه وحيت مكايقدرش يخصر ليها خاطرها مشيت وعاودت ليها كولشي - بصاح مزيان عاد تحلو ليه العنين أصلا مكنتش باغاك من نهار لول كنت بغيت بنت ختي حليمة الله يعمرها دار زوينة وحادكّة متبتة ومرزنة ولسانها حلو تاكليها بحوايجها - بصاح أخالتي إيوا حلي ودنيك معايا مزيان عرفتي إلى مشات كلاتليه عقلو هاديك لي كيظل نهار ومطال هاز تليفون على ودها مغا نبقى لا أنا لا انتي...دابا ياك نهار كلو وهو هاز تليفون إدا تاهيا نهار كلو وهي هازا تليفون وتخيلي تزوج بيها وجابها لدار غتولي انتي بحال لخدامة عليها حيت تليفون كيقولو عليه بلية مغاتقدرش تفارق عليه وزيدي عليها فاش تولد ليه لولاد نحلف ليك أخالتي تا غاتولي جفاف - ممم عندك صح اللهم عمش ولا عمى سيري طيبي لعشا وعلى متسالي فريدة نفكرو أش غانديرو - أويلي أخالتي يلا بقينا نتسناو داك المسلسل يسالي غا يكونو قيدو ولادهم فالمدرسة - وتسالي غير الحلقة الله يغبر ليك شقف ها ناري شحال مكلخة طيبت العشا ورديتو يطيب على مسالا المسلسل ديال سامحيني وباش ندخلو أنا وعجوزتي فالموضوع خصنا ساعة فيها ضريب المعاني وحشيان الهضرة وشوية ديال المعيور كّود - صافي كوني هانيا غير يرجع لدار نعطيه ببلغتي لراس ينسا واش عندو تليفون - أويلي أخالتي تي بغيتي الراجل يخرج ما يرجع واش باغا تخرجي ليا على مستقبلي - مم نضربو بسنطة بوه مايهزش قرفادتو - انتي باغا ولادي يبقاو يتامى ... أخالتي راه خصو يولي يكره هادي لي معمرة ليه وقتو وميعيقش بلي حنا سباب - ممم وكيغانديرو ليها؟؟؟ بقينا ساعة وحنا كنحللو وناقشو وندابزو عاد لقينا الحل - خالتي شميت شي ريحة ماشي تال لهيه - تأنا ... أويلي ألمسخوطة هادا العشا لي كيتحرق بقينا تاني بلا عشا مشيت لقيتو تشوط عاودناه بزربة أنا وياها وغير حطيناه عل طبلة بدات كتعاير فيا درت راسي غضبت ونضت كنقلب على التليفون راجلي حليت الفايسبوك جاب الله لقيتو محلول وشفت سميتو وسميت هاديك لحلوفة باش داخلين وبديت كنقرى لميساجات ياعيني عل الكلام الحلو لي معمرو قالو ليا مكرهتش نمشي نشقفو ليه على مخو دابا ولكن درت حجرة على قلبي وصبرت لا غديه مشيت عند مول سبير وعاودت ليه مشكيلتي باش يعاوني و بلا ميبقا يكتر عليا فالأسئلة بيراطينا ليها لفايسبوك وملي حليناه لقينا شحال من واحد ضاحكة عليه المصيبة لوخرا .... المرة جايا لي شديت فيه تليفونو (بعد ما لهاتو عجوزتي لي كتعاود ليه على جمال بنت خالتو معرفتها واش معايا ولا ضدي) شديت نمرت داك القردة بدلتها وخليت نفس سمية حيت راجلي عقلو على قد الحال ملي كيصوني كنقطع وملي شفتو كتر دوزت ليه خوه لي متافق معانا سمعو لمعيور نيت و قاليه راها صحيبتو هو وإلى مبعدش منها غادي يحكلو وجهو فالحيط هه راجلي العزيز مسكين بايت مقلق وطلعة ليه القردة لراس كيقلب غير فيمن يشد وخصوصا فاش حل الفايسبوك كيقلب عليها وكملت ليه أنا داكشي لي ناقصو بالمعيور....وقبل مايفيق محيت داك نمرة لي ضحكنا عليه منها ورديت نمرتها باش ما يعيقش بينا وقبل ما يتلاقاها مرة وخرا المكلخة لوخرا كّاع لي داخلين عندها فالفايسبوك عاطاهم عنوانها لداكشي صيفطنا ليها أنا وعجوزتي واحد المرة شهبة ريشاتها مزيان وقالتليها بلي هي مراتو هه أنا شعري كحل يعني فاش تجي تشكى ليه مغايكون عندها تا دليل وتبان غير كتخرف
فالعشية دخل راجلي لدار كاعي أنا غير شفتو فداك الحالة قلت هادي هي لخرا ليا مشيت كنجري تخبيت مورا عجوزتي شاف فينا بجوج ودخل لبيت وزدح علينا لباب بغيت نمشي عندو وهي تشدني عجوزتي - فاش يكون راجلك مقلق متبانيش قدامو حيت ضروري ميجرحك وإلى عماك الله وبنتي قدامو ديري قطن فودنيك وحدري راسك - زعمة يكون عاق بينا؟؟؟ - ويعيق كّاع راه هو لي خصو يحشم على عرضو ملي وصل ليل مبغاش يتعشى وملي دخلت عندو لقيت تيليفون فالأرض مشخشخ ومدور وجهو لحيط بغيت نعاود ليه و نطلب منو سماحة ولكن أنا منادماش على داكشي لي درت كنبغيه وبغيتو غير ليا وزايدون هاديك المسخوطة غير كضحك عليه وعلى عشرة غيرو لي شريت ليها صداع معاهم تاهوما باش تعلم تلعب مع رجال مزوجين حطيت راسي عل المخدة وكّلت يستاهل راجلي العزيز كتر - انتي لي درتي هاد تخرويض كامل ياكما يسحابك أنا حمار - إينا تخرويض خليني نركّد راه تبعني تخمال غدا - بيراطتي ليها الفايسبوك وصيفتي ليها مرا وخرى ضربها - يا حليلي على راجلي دكي... أهاه أنا لي درتها أش غادير غتزوج بها انت أصلا كتخوني معاها وهي كتخونك مع عشرة غيرك هاك حل الفايسبوك قرا لميساجات وشوف تاريخ مزيان - علاش مقلتيهاش ليا ملي عرفتيني كنهضر معاها ونحلو المشكل غي بيناتنا - غادي تكدبني وتقولي غي كنخرف .. واش عقلتي على نهار لي دابزنا فيه قلتي ليا كنلعب غير فليجو ووليتي ملي كتشوفني كتخبيه - انتي سباب فهادشي كولو - أه عندك صح أنا سباب فهادشي لي كيطرا أنا لي وقّْفت حياتي المريحة باش نعيش معاك الحياة التعيسة أنا سباب ملي كنديها غير فدار راجلي باش معمرو يتشكى مني وميشوفش وحدة وخرى أنا سباب حيت مقدرتيش تفهمني وتعدرني بلي راه ماشي ساهلة عليا نكون عايشة حياتي كاملة مع عائلتي لي كيبغيوني كتر من راسهم وممسؤولة على تاحد وبين يوم وليلة ولات عليا مسؤوليات وواجبات كثار أنا راه ماشي ملاك ولا إنشطاين باش نعرف هادشي فدقيقة كان عليك تصبر معايا ماشي دغيا تقلب عل البديل - أنا كنت كنبغيك وباقي كنبغيك - للي كيبغي مكيخونش ليل كولو وأنا فايقة كنفكر أنا بصح هملتو ولكن ماشي مبرر يخوني وخا غير فشاط وحنا مزال مكملناش تا عام شفت حتى عييت وسديت عيني مايمكنش نكمل بحال هاكا غنبقى ديما شاكا فيه وشكون قال كيدارها مرة يديرها جوج مرات بقا حل واحد أرض الله واسعة وإن أبغض الحلال عند الله طلاق
صبح صباح وصبحت جامعة حوايجي بغيت نمشي عند واليديا على منطلق ونمشي نقلب على خدمة ونخدم و نستقل براسي غا تكون صعيبة ولكن ماشي مستحيلة وزايدون طلاق ماشي هو نهاية العالم يلاه بغيت نحل الباب وانا نتلاقى مع عجوزتي - سمحي ليا أخالتي إلى درت ليك شي حاجة قلقاتك - متقوليش هاد الهضرة ألحمقة فين غادة على صباح - غادة لدارنا مبقيتش قادرة نزيد نصبر - أجي نجلسو ونهضرو واش على ود شقا صافي ألالة أنا لي نولي نطيب ومعمركي تسمعي من عندي شي كلمة تقلق خاطرك غير رتاحي ليا مع راسك - لا مصاب كن غير كان على ودك كن نبقى هنا تايدي مول الامانة أمانتو - وعلاش؟ - راكي عارفة لمرا ملي كيغدرها راجلها معا مرا وخرا باش كتحس - ياك تهنينا منها؟؟ - وشكون قال مغا يغدرنيش مع مرا وخرا غانبقا حياتي كلها وانا خايفة وشاكا - سمعي أبنتي أنا كنت بحالك فواحد الوقت تا أنا غدرني الحاج مع واحد شيخة كانت عندنا فدوار وكون درت داكشي لي بغيتي ديري ليوم كّاع منكون لا أنا لا نتي هنا... الزواج أبنتي ديما كيوقع فيه المشاكيل وخصوصا فلول حيت كيكونو معرفينش بعضياتهم مزيان وكيتصدمو فشي حوايج كان كل واحد يسحابو راه كاينة فلاخور .. الراجل لابد عينو متزيغ حيت كيظل خارج كيشوف غير الغطا مكيشوفش الداخل وحيت مراتو بوحدها لي كيشوف فداخل كيولي يقارنها مع لي برا لداكشي خصكي تكوني ديما حسن من هادوك لي برا... أنا عارفة بلي هادشي شوية صعيب ولكن فاش كتشوفي فعينين راجلك بلي انتي أجمل مرا داك ساع كتكون حلاوة الزواج .. وهادي أول مشكلة خصكي تواجهيها ماشي تهربي منها صبري وإن الله مع الصابرين = جا راجلي ولقاني وسط صيكاني ودموعي فعيني - علاش هازا صيكانك - عجوزتي : دايرها يزلق فيها جمل وباقي كتسول أراس طارو دوز طلب من مراتك سماحة راه والله وخطات خطوة لبرا يا تاتبعها - راجلي: أنا عارف بلي غلطت وغلاط كبير ميمكنش لأي مرأة كتبغي راجلها فهاد العالم تغفرو ولكن كنواعدك إلى عطيتيني فرصة وحدة غير وحدة لي كنطلب منك كنحلف ليك قدام الله والواليدة أنك عمركي تندمي وغنكون ليك نعمة زوج ونعمة الاب و الاخ وصديق ولي حتاجتيه تلقايه فيا ...عمري فحياتي نعاود ولا نفكر نخونك تاداك تليفون هرستو وغنحيد أي حاجة توقف قدام سعادتنا كنحلف ليك .. فرصة وحدة - أنا: وحدة ماشي جوج .. تأنا كنحلف ليك بلي أغلاطي عمرهم يتعاودو وبلي غانكون نعمة زوجة ومنبقاش نحرق العشا هه - عجوزتي : أحسن حاجة ديريها ههه إيوا نوض سير لخدمتك وشد كونجي - راجلي: كنت ناوي نشدو باش نمشيو أنا ومرتي ندوزو شهر العسل - عجوزتي : أيه ندوزوه مجموعين فالعروبية عند خالتك حليمة - راجلي: مي واش بغيتيني نزيد صيكاني على هاد صيكان وندي مراتي مائة مرة قلت ليك بلي مكتعجبنيش بنت خالتي حليمة - عجوزتي : داتها غي فيك راه سيمانا جايا عندها العرس بواااحد راجل سيد رجال ولد القايد ديال دوار - أنا: اللهم لك والحمد والشكر عدد نعمك وأنا نفهم علاش عجوزتي كتنصحني وكتقول ليا بنيتي هي مشا ليها البديل وكي قالت هي اللهم عمش ولا عمى ههه دازو ليامات وأنا ولا شغلي مكّاد وطيابي بنين و مع الوقت تعلمت كيفاش نساوي بين الإهتمام بالبيت والإهتمام بزوج ... راجلي لحد ساعة باقي كيوفي بوعدو ممنقصني من تاحاجة الحمد الله كيخرجني فاش كيكون عندو الوقت والكلام الحلو ولا ديما مسمعو ليا ... عجوزتي حبيبتي ازدادت حنانا من بعد متزوجات بنت ختها و من بعد محملت بولدي لول ولا بنتي لولة ولات تحيد الماكلة من بين ولادها وتعطيها ليا احم احم قالتليك مبغاتش حفيدها تخرج فيه شي حاجة ههه عمري مندمت حيت عطيت لراجلي فرصة ولا حيت صبرت فشي مرات كنحمد الله حيت خاني حيت كن مخانيش كّاع ميتبدل وأنا كّاع منعرف بقيمة داري و معزت عجوزتي عندها ... فلول كان يسحابني هادشي شر ولكن تأكدت فلخر بلي الله كيدير لينا غير لي فيها لخير غير خصنا نصبرو منستسلموش لليأس وفلخر كنقوليكم لبنات لي مزال ممزوجينش استمتعو فدار باكم محد معندكوم تا مسؤولية ضحكو شطحو تشقلبو على خاطر خاطركم والبنات لي مزوجين تانتوما مرة مرة ديرو هادشي وخففو الحمل شوية على كتافكم حيت دنيا دايزة كيبقى غير الأعمال والدكريات و كنتمنى ليكم كلكم حياة سعيدة بإذن الله خالية من الملل والروتين تمت بحمد الله